भोजपुरी चैता चइता लोक गीत Bhojpuri Chaita Lokgeet चइता सांग भोजपुरी
चइता सांग भोजपुरी | भोजपुरी चइता लोक गीत
भोजपुरी चइता लोक गीत 1-बितले फगुनवा।
बितले फगुनवा ये सइया,
गऊआ लागल कटनिया के ज़ोर।
कईसे होइहे गेंहू के कटनिया मोर।
गऊआ लागल कटनिया के ज़ोर।
सुना-2 मोर परदेशी बालम
धईके आवा जल्दी रेलगड़िया।
चलल जाई खेतवा होते रे भोर।
गऊआ लागल कटनिया के ज़ोर।
सुना -2 मोर लेहुरा देवरवा।
चलावा ना दिन रात मोबइलिया।
करबा ना किसनिया खइबा का कौर।
गऊआ लागल कटनिया के ज़ोर।
सुना -2 मोर छोटकी ननदिया।
घूमा जनी तू खाली खरीहनवा।
मिली करा तू कटनिया माना न बतिया मोर।
गऊआ लागल कटनिया के ज़ोर।
श्याम कुँवर भारती (राजभर )
कवि/लेखक /समाजसेवी
बोकारो झारखंड, मोब 9955509286
भोजपुरी चैता गीत काला तिलवा ये रामा
गोरी गोरी गलिया में काला काला तिलवा ये रामा गोरी गलिया में।
नाकिया में शोभे ले सोना के नाथूनिया ये रामा नकिया में।
जब तू लगावेलू अंखियां में करिया कजरा।
ठीक दोपहरिया में छाई जाला काला बदरा।
बाजेले छम छम पायलिया ये रामा गोड़वा में।
होठवा तोहार गुलबवा के खिलल कलिया।
पवनवा उड़ाए तोहार काली लम्बी बलिया।
महकेला चंपा कारी केसिया ये रामा कारी केसिया।
लचकेला लप लप खेतवा में गेहुआ के बलिया।
धरती हिलेले चलेलू जब गोरी लचकत चलिया।
हीलेले कनवा के सुनर कनबलिया ये रामा कनवा में।
अमवा के मोजरवा महकी तन मदनवा सतावे।
महुआ के कोचवा बदन अगनवा जरावे।
चईतवा में बिगड़ल सभकर हलिया ये रामा चईतवा में।
श्याम कुंवर भारती
बोकारो झारखंड
भोजपुरी चैता गीत बोलेले कोयलिया ये रामा
अमवा की डलिया पर बोलेले कोयलिया ये रामा।
खेतवा में गदरल मटरिया ये रामा।
खेतवां में।
जब जब बहे पूर्वी बयरिया।
लप लप लपके गेहुआ कियरिया।
लपकेले गोरी के नाथुनिया ये रामा।
गलवा पर।
महुआ के कोचवा मदन रस टपके।
टप टप मथवा पसीना गोरी टपके।
चूयेला अमवा के मोजरिया ये रामा।
गोरिया के।
बहकेले गोरी के बदनिया ये रामा।
हरियर चनवा के मनवा पगलाइल।
उखिया के पोरवा में रसवा भरी आइल।
गोड़वा में
बाजेले छम छम पायलिया ये रामा।
गोड़वा में।
बितल फागुन चैत मगन चढ़ी आइल।
देहिया में सजनी अगन बढ़ी आइल।
अंखियां में।
अंखियां में गोरी पिया के सूरतिया ये रामा अंखियां में।
श्याम कुंवर भारती
बोकारो झारखंड।
Read More और पढ़ें:
0 टिप्पणियाँ