Ghazal In Roman English : Asangani Mushtaq Rafeeqi

Ghazal : Asangani Mushtaq Rafeeqi

Mujh ko laaya hai bahut souch kay laanay wala

Mai teray shehar say you(n) hi nahi jaanay wala

Mai jo kehta hou(n), faqat boul na samjhou uss ko

Fun bhi aata hai mujhay kar kay dikhanay wala

Koyi kehta hai meray sher may angaray hain

Koyi likhta hai mujhay aag bujhanay wala

Yasiyat hi tumhi hath aayegi mujh say mil kar

Mujh ko aata nahi andaz lubhanay wala

Waeezoun kay to barray pehray lagay thay uss par

Aagaya shehar may kyou(n) kar a hansanay wala

Kkyou(n) mujhay bhool gaya, iss pay mujhay hairat hai

Chand tarou(n) say meri dunya sajanay wala

Mujh ko kya kya na rahea(n) uss say ummiday(n) , laikin

Khali hath aaya teray shehar say aanay wala

Kis qadar bhool bhulaiyaa(n) hi teray rastay may

Khou gaya raah may khud raah batanay wala

Khwab daykhou na Rafeeqi kay yaha(n) basti may

Koyi Yousuf nahi taabeer batanay wala

Urdu Ghazal in English by Asangni Mushtaq Rafiqi

Ghazal 

Asangani Mushtaq Rafeeqi

Meray paighaam say kha’if, meray har kaam say kha’if

Hai kyou(n) is shehar ka har fard mayray naam say kha’if

Mujhay tayri jihalat say nahi hai koyi darr laikin

Faqeeh-e-shehar mai hou(n) bas teray aouhaam say kha’if

Ussay maloum hai kya hai teri auqaat basti may

Ammer-e-shehar kya houga teray ilzam say kha’if

Teray a hoor a jannat mubarak ho tujhay wa’iz

Tujhay hai fikr douzaq ki mai hou(n) aaram say kha’if

Samjhta hai o raftaar-e-zamana is liye shayad

Nahi houta kabhi o gardish-e-ai’yam say kha’if

Mujhay dushwariyou(n) say housla milta hai jeenay ka

Zara bhi mai nahi houta kabhi aalam say kha’if

Musalma(n) ho kay bhi islam par aamil nahi hou(n) mai

A dunya phir bhi rehti hai meray islam say kha’if

Salasal ko jo tamgha, daar ko inaam kehtay hain

Nahi houtay Rafeeqi o kisi anjam say kha’if

Tumare Sar Ki Turkey Topiyan Kya Hui Basha?

A nazm by Asangani Mustaq, Vaniyambadi

Kya huien Basha

Asangani Mushtaq Rafeeqi, Vaniyambadi

Tumhare sar ki turki topiyan woh kya huien Basha

Barray roumal, ujlee lungiyan woh kya huien Basha

Chabotre jo kabhi pehchan thay acchay makanoun ke

Barray lougoun ki ujlee darhiyan woh kya huien Basha

Woh ujlee chaadrein aur kalay burqae seedhay saaday se

Aur unn mein simattee simattee bibiyan woh kya huien Basha

Barroun se baat karte waqt sar ko dhaanp layte theen

Haya paiker, misali betiyan woh kya huien Basha

Barouse eid jana eid gaah ko bail gaari mein

Chawani aur Athani eidiyan woh kya huien Basha

Woh matti ki paleton khaboun mein milaad ki dawat

Mehaktay dalchay biryaniyan woh kya huien Basha

Siyasat doghla pan sab ke lahjoun se jhalakta hai

Shehar ki bholi bhaali hastiyan woh kya huien Basha

Jisay dekho laga hai chaploosi mein ameeron ki

Hamiyat, hauslay, baybakiyan woh kya huien Basha

Samjhti theen parhanay ko ibadat se bhi afzal jo

Rafeeqi seedhi saadi hastiyan woh kya huien Basha